Байгедеги батир кимге буюрду? Тоо аралай чуркаган күлүктөрдүн видеосу

Эгемендүүлүк майрамына карата ат чабыш уюштурулду. 89 күлүктү чабандестер Байтик айылынан тоо аралата чаап кетишти. Туягынан чаң чыккан тулпарлар 31 чакырымга чуркап, майрам өтүп жаткан Чуңкурчакка кирип барды. “Дулдул“ аттуу күлүк марага 200 метрдей калганда жыгылды. Аргымактын жүрөгү жарылып кеткенин айтып, мууздоого аргасыз болушту. Ал эми алдыңкы байгени төмөнкүлөр алып кетти: Биринчи орун — Шейшеналы Дүйшөмбиевдин “Кара шумкар“ күлүгү, Талас облусунун Кара-Буура району. Экинчи орун — Аманов Кайымдын “Ак таноо“ күлүгү, Жалал-Абад облусунун Шамалды-Сай айылы; Үчүнчү орун — Болот Акировдун “Ак чий“ күлүгү, Ысык-Көл облусу, Ак-Суу району. Ал эми Султан Маткеримовдун “Дулдул“ аттуу күлүгү жыгылгандан кийин жүгөнүн шыпырып алып чабандеси жөө чуркап өттү. Натыйжада ага төртүнчү орун ыйгарылды. Алдыңкы болуп келген тогуз күлүк байгеге илинди. Биринчи орунга Бишкек шаарынан бир бөлмөлүү батир, экинчи орунга 500 миң, үчүнчүгө 300 миң, төртүнчүгө 200 миң, бешинчиге 100 миң сом, калган төрт күлүккө 50 миң сомдон байге берилет.