новости

Быслъымэн пстэуми анахь агъэлъапlэрэ уахътэхэм ащыщэу Нэкlмазэм иапэрэ мафэ тефэу ти Адыгэ Республикэ мэщыт дахэ, мэщыт зэкlужь къыщызэlутхыгъ. Къуаджэу Кощхьаблэ игупчэ дэдэ ар щагъэпсыгъ. Итеплъэкlи, ыкIоцIыкIи районым имызакъоу, зэрэ республикэу ащ къыгъэкlэрэкlагъ. Мэщытыр цlыф кlуапlэ зэрэхъущтым, быслъымэнхэр зэрзэфищэщтым сицыхьэ телъ. Адыгеим щыпсэурэ быслъымэнхэм диным епхыгъэ шlэныгъэ тэрэзхэр, шlэныгъэ куухэр зыщагъотыщт гупчэу ар афэхъунэу сэлъытэ.   Мэщытым ишlын зи мылъку хэзылъхьэгъэ, lофыгъом хэлэжьагъэхэм зэкlэм лъэшэу сафэраз. Цlыфыныгъэм, хьалэлныгъэм, гукlэгъуныгъэм ящысэу а зекlуакlэр сэлъытэ. Мэфэкl лъапlэмкlэ ыкlи мэщытым иlофшlэн зэриублагъэмкlэ зэкlэм сыгу къыздеlэу сышъуфэгушlо, Нэкlмэзэ хъяр шъутехьанэу шъуфэсэlо! Шlоу шъушlэрэр бэгъонэу, lоф дахэу зешъухьэхэрэр, сэдакъэу жъугощырэр псапэ хъунэу,  шъуинэкlхэр, шъуинэмазхэр Тхьам къабыл шъуфишlынэу, шъуилъэlухэр къызэхихынэу, псауныгъэ пытэ шъуиlэнэу, гушlуагъор, насыпыр къышъобэкlэу шъупсэунэу сышъуфэлъаlо!