Марий Эл ТВ: Шочмо йылмым да литературым эн сайын туныктышым ойырат

Россий кӱкшытыштӧ шочмо йылмым да литературым эн сайын туныктышым ойырат. 16 сентябрьыште Казаньыште тыгаяк лӱман конкурс почылтын. Элнан 79 регионжо гыч 36 калык гыч лекше шочмо йылмым да сылнымутым туныктышо-влак погыненыт. Нуно урокым пуат, мастарлык классыште шке вийыштым тергат да туныктымо методикышт дене палдарат. Марий Элын чапшым Курыкмарий районысо Пайскырык школышто марий йылмым да литературым туныктышо Наталия Павлова арала. Ешарем, тудо «Марий йылмым эн сай туныктышо-2024» республикысе конкурсышто сеҥен.