Преподобный Серапион Кожеезерский

Преподобному Серапиону Кожеезерскому Тропарь,глас 5. Путь ко спасе́нию чрез Христа́ указа́л еси́, / ага́рянское нече́стие ро́да своего́ отри́нув, / всем се́рдцем возлюби́л еси́ Христа́ Бо́га, /боя́рские по́чести ни во что́ же вмени́в, / по́двиг отше́льнического жития́ избра́л еси́, / с пустынножи́телем Ни́фонтом Го́споду послужи́л, / в пусты́ни моли́твами и труда́ми прославля́я Святу́ю Тро́ицу, / о́трасль до́брого ко́рене яви́лся еси́, / плод до́брый Го́сподеви принесе́, / Его́ же, о́тче Серапио́не, // моли́ непреста́нно о всех нас. Кондак,глас 2. Благода́ть Бо́гом да́нную стокра́тно умно́жил еси́, / в пусты́ни се́верной оби́тель основа́в / и мно́жество и́ноков любо́вию собира́я и пита́я, / труда́ми тя́жкими и поноше́ниями от бра́тий свои́х не уязви́лся еси́, / о́браз кро́тости, терпе́ния и смире́ния явля́я, / тем же мо́лим тя, о́тче преподо́бне Серапио́не, // испроси́ у Го́спода сих благода́тных дарова́ний душа́м на́шим. Величание Ублажа́ем тя,/ преподо́бне о́тче Серапио́не,/ и чтим святу́ю па́мять твою́,/ наста́вниче мона́хов// и собесе́дниче А́нгелов. Молитва О, преподобне и Богоносне отче наш, Серапионе! Услышав глас Христа Бога нашего, ты агарянское нечестие соплеменников-татар безвозвратно отринул еси и неуклонно шествовал путем Христовых заповедей, многим путь ко спасению указав. Помози и нам, слабым, малодушным и немощным, неуклонно шестовать тесным путем Христовых заповедей. Ты, вся красная мира сего ни во что же вменив и соблазны земной славы презрев, Богу послужить в иноческом чине сподобился еси и скорби пустыннического жития с радостию понесл. И нас вразуми любити славу Божию паче земных почестей, не оставь нас молитвами твоими, дабы и нам поработать Господеви с усердием и благодарением, оставив вся суетная и ложная и скоропреходящая мира сего. Ты, ради любви к Богу и братии, тобою собранной, многие и тяжкие труды претерпевый и поношения и заушения от них безропотно приял, славословя Бога, научи и нас терпению, смирению и незлобию. Ты, отче преподобне, за ревность в служении Господу и чистоту душевную, сподобился быть устроителем обители в стране северней, о ней же непрестанно моли Христа Бога, да сохранится обитель сия от всех навет вражиих за грехи наши от Бога попускаемые.