100 балл илекенсем нумайланнă

Паян абитуриентсен хĕрӳ тапхăр пырать. Патшалăхăн пĕрлехи экзаменĕсем хыçра, аслă вĕренӳ çӳрчĕсене пĕлӳ пухма кĕме хатĕрленеççĕ. 2023-мĕш çулта шкул пĕтерекенсем патшалăхăн пĕрлехи экзаменĕсене мĕнлерех шайра тытнă-ши? Ун пирки Чăваш Республикин вĕренӳ министрĕ Дмитрий Захаров каласа пачĕ. Кăçал шкул пĕтерекенсем республикăри 35 шкулта хăйсен пĕлĕвне тĕрĕслерĕç. Чăвашра 5 пине яхăн ача шкул саккипе сыв пулашрĕ. Халĕ ĕнтĕ вĕсем пурте пулас студентсем, аслă вĕренӳ çурчĕсене вĕренме кĕме хатĕрленекенсем. Шкул ачисем çулсерен тĕрлĕ енлĕ аталанни, вĕренӳре çитĕнӳсем туни савăнтарать. Палăртса хăвармалла, вĕренсе тухакансенчен 15% шкула ылтăн медальпе, хĕрлĕ аттестатпа пĕтернĕ. Вĕсенчен 331 ача Шупашкар хулинчи шкулсенче вĕреннĕ. Çавăн пекех Çĕнĕ Шупашкар тата Патăрьел тăрăхĕнчен «5» паллăпа çеç вĕренсе тухакансем чылай. Кăçал патшалăхăн пĕрлехи экзамĕнĕсене тытса 100 балл пухнă хастар çамрăксен йышĕ те ӳснĕ. Вĕсем çитмĕл тăххăрăн. Пĕр ача тӳрех икĕ предметпа чи çӳллĕ балл илнисем те пур. Çĕнĕ Шупашкарти 3-мĕш тата 18-мĕш лицейсенчен 2 ача, Шупашкарти 2-мĕш лицейри пĕр çамрăк икĕ предметпа 100-шер балл пухнă. Чăваш Республикин вĕренӳ министрĕ Дмитрий Захаров палăртнă тăрăх, чи пысăк бал вырăс, акăлчан чĕлхисемпе, обществознани, хими, информатика предмечĕсемпе тата профильлĕ математикăпа пухнă. Çавăн пекех биологи, географи, физика предмечĕсене суйлакансен кăтартăвĕсем те ӳснĕ.