Проповедь иеромонаха Пантелеимона после утрени Великой Пятницы,

Раздѣли́ша ри́зы моя́ себѣ́, / и о оде́жди мое́й мета́ша жре́бій. Проповедь настоятеля храма Спаса Всемилостивого в Кусково иеромонаха Пантелеимона после утрени Великой Пятницы, Конда́к Тріо́ди, гла́съ 8‑й: (Тріодь постная. Ч. 2. 2002. Л. 443) На́с ра́ди распя́таго, пріиди́те вси́ воспои́м, того́ бо ви́дѣ Марі́а на дре́вѣ, и глаго́лаше: а́ще и распя́тіе терпи́ши, ты́ еси́ Сын и Бог мо́й. И́кос: Своего́ а́гнца а́гница зря́щи к заколе́нію влеко́ма, послѣ́доваше Марі́а просте́ртыми власы́ со инѣ́ми жена́ми, сія́ вопію́щи: ка́мо и́деши ча́до? чесо́ ра́ди ско́рое тече́ніе соверша́еши, еда́ другі́й бра́к па́ки е́сть в ка́нѣ галіле́йстѣй, и та́мо ны́нѣ тщи́шися, да от воды́ и́м віно́ сотвори́ши? иду́ ли с тобо́ю ча́до, или́ па́че пожду́ тебе́? да́ждь ми́ сло́во сло́ве, не молчя́ мимоиди́ мене́, чи́сту соблюды́й мя́: ты́ бо еси́ Сын и Бог мо́й. Тріо́ди, гла́съ 1‑й. Самогла́сны: (Тріодь постная. Ч. 2. 2002. Л. 447) Вся́ тва́рь измѣня́шеся стра́хом. Вся́ тва́рь измѣня́шеся стра́хом, зря́щи тя́ на Крестѣ́ ви́сима Христе́: со́лнце омрача́шеся, и земли́ основа́нія сотряса́хуся, вся́ сострада́ху созда́вшему вся́. во́лею на́с ра́ди претерпѣ́вый, Го́споди сла́ва тебѣ́. Сті́хъ, гла́съ 2‑й: Раздѣли́ша ри́зы моя́ себѣ́, / и о оде́жди мое́й мета́ша жре́бій. Лю́діе злочести́віи и беззако́нніи, вску́ю поуча́ются тще́тным? вску́ю живота́ всѣ́х на сме́рть осуди́ша? ве́ліе чу́до, я́ко созда́тель мі́ра в ру́ки беззако́нных предае́тся, и на дре́во возвыша́ется человѣколю́бец, да я́же во а́дѣ ю́зники свободи́т зову́щыя: долготерпѣли́ве Го́споди сла́ва тебѣ́. Сті́хъ: Да́ша в снѣ́дь мою́ же́лчь, / и в жа́жду мою́ напои́ша мя́ о́цта. Дне́сь зря́щи тя́ непоро́чная Де́ва на Крестѣ́ сло́ве возвыша́ема, рыда́ющи Ма́тернею утро́бою, уязвля́шеся се́рдцем го́рцѣ, и стеня́щи болѣ́зненно из глубины́ души́, лице́ со власы́ терза́ющи. тѣ́мже и пе́рси бію́щи, взыва́ше жа́лостно: увы́ мнѣ́, боже́ственное ча́до, увы́ мнѣ́, свѣ́те мі́ра: что́ заше́л еси́ от о́чію мое́ю а́гнче Бо́жій? тѣ́мже во́инства безпло́тных, тре́петом содержи́ми бя́ху, глаго́люще: непостижи́ме Го́споди сла́ва тебѣ́. Сті́хъ: Бог же Царь на́ш пре́жде вѣ́ка, / содѣ́ла спасе́ніе посредѣ́ земли́. На дре́вѣ ви́дящи ви́сима Христе́, тебе́ всѣ́х зижди́теля и Бо́га, безсѣ́менно ро́ждшая тя́, вопія́ше го́рько: Сы́не мо́й, гдѣ́ добро́та за́йде зра́ка твоего́? не терплю́ зрѣ́ти тя́ непра́ведно распина́ема: потщи́ся у́бо, воста́ни, я́ко да ви́жу и а́з твое́ из ме́ртвых тридне́вное воскресе́ніе. Сла́ва, Тріо́ди, гла́съ 8‑й: (Тріодь постная. Ч. 2. 2002. Л. 447 об.) Сла́ва Отцу́, и Сы́ну, и Свято́му Ду́ху. Го́споди, восходя́щу ти́ на Крест, стра́х и тре́пет нападе́ на тва́рь, и земли́ у́бо возбраня́л еси́ поглоти́ти распина́ющих тя́, а́ду же повелѣва́л еси́ испусти́ти ю́зники, на обновле́ніе человѣ́ков, судіе́ живы́х и ме́ртвых, жи́знь прише́л еси́ пода́ти, а не сме́рть: человѣколю́бче сла́ва тебѣ́. И ны́нѣ, Тріо́ди, гла́съ 6‑й: (Тріодь постная. Ч. 2. 2002. Л. 447 об.) И ны́нѣ, и при́сно, и во вѣ́ки вѣко́въ. Ами́нь. Уже́ омака́ется тро́сть изрече́нія, от суде́й непра́ведных, Iису́с суди́мь быва́ет, и осужда́ется на Крест, и стра́ждет тва́рь, на Крестѣ́ ви́дящи Го́спода. но естество́м тѣлесе́, мене́ ра́ди стражда́й благі́й, Го́споди, сла́ва тебѣ́.