Ысыах 2024

Ыам ыйын 25 күнүгэр Үс Хатыҥ киэҥ кырдалыгар оскуолабыт ыһыаҕа үрдүк таһымнаахтык буолан ааста. Быйылгы ыҺыахпыт Россия5а Дьиэ кэргэн, Саха сиригэр О5о саас сылыгар ананна. Барыта 50 кылаас коллектива төрөппүттэрин кытта кытыннылар. Ыһыах сүрүн түһүлгэҕэ алгыһынан аһылынна, сиэри-туому тутуһан алгысчыт 7 кыталык кыыс, 9 туруйа уол арыалдьыттаах Аал уотун отунна, Айыыһыты, сир- уот иччилэрин күндүлээтэ, оҕолорбут сайдар кэскиллэрин түстээтэ. Оскуолабыт баһылыга Василий Михайлович Владимиров 2023-2024 үөрэх сылын этэҥҥэ түмүктээбиппитинэн оҕолору, төрөппүттэри, үлэһиттэри эҕэрдэлээтэ. Ыһыах аһыллыытын 10в (Кылаас салайааччыта Вардамова А. И), 8а (Тюляхова Л. И, Ноева Т. Н) кылаас үөрэнээччилэрэ киэргэттилэр, иилээн-саҕалаан Черкашина Тамара уонна Федоров Алеша ыыттылар. Төрүт үгэһи тутуһан, төгүрүччү туран өбүгэбит үҥкүүтүн - оһуохайы оройуттан туттубут. Үгэс быһыытынан оҕолор «Ыһыах күнүн уруйдаан!» эҕэрдэ кэнсиэрдэрэ буолла. Маны таһынан «Саргылаах түһүлгэ» күрэҕэр туох баар кылаас барыта бэйэтин түһүлгэтин киэргэтэн-симээн, саха төрүт аһын сандалы толору кэккэлэтэ уурталаан, дьүүллүүр сүбэни ырыалаах-тойуктаах көрүстэ. “Алгыстаах дьиэ кэргэн» үс көлүөнэнэн саха таҥаһын күрэҕэр сир-симэҕинии симэнэн, таҥара табатыныы таҥнан, киэргэнэн кэлбиттэрин сөҕө-махтайа көрдүбүт. Былыр-былыргыттан сахалар кыыс оҕолорун өһүөннээх тыл тиийбэтин, кырыктаах харах быһа көрбөтүн диэн харыстыыллара. Кыыс оҕону кыра эрдэҕиттэн кэрэни кэрэхсииргэ, дьиэ араҥаччыта буоларга иитэллэрэ. Ол үгэһи тутуһан, оскуолабыт кыргыттарыгар «Толбоннурар уһун суһуох” күрэх ыытылынна. Барыта 39 уһун суһуохтаах кэрэ кыыс кытынна. Саамай уһун суһуох - 14 тутум 2 тарбах – Максимова Яна, 7д кылаас үөрэнээччитэ, көрөөччүлэр биһирэбиллэрин ылыан ылла! Ханнык ыһыах өбүгэ оонньуута суох буолуой?! Кус быһыйдар сырыстылар, эрчимнээх иҥиирдээх, сымса уолаттар хапсаҕайдастылар, кылаас аайыттан аҕалар канат? тардыстылар. Оҕолорбут, төрөппүттэр, учууталлар, айылҕаҕа астына-дуоһуйа сынньанан, аны күһүҥҥэ дылы күүс-уох эбинэ, сайыҥҥы сынньалаҥнарыгар тарҕастылар.