«Գևորգ Մարզպետունի». Audiobook

Alpha News-ի բացառիկ ուսուցողական նախագիծը՝ Audiobook-ը, ներկայացնում է Մուրացանի «Գևորգ Մարզպետունի» վեպը: Մուրացանը ցանկանում էր Գևորգ Մարզպետունու կերպարի միջոցով ժողովրդին փոխանցել իր սերը հայրենիքի նկատմամբ։ Շատ քննադատներ կարծում են, որ Մարզպետունու շուրթերով խոսում է ինքը՝ հեղինակը։ Վեպի գաղափարը հայ ժողովրդի ազգային ազատագրական պայքարն է արաբական զավթիչների դեմ: Վեպի գլխավոր հերոսը Գևորգ Մարզպետունի իշխանն է: Նրա նպատակն էր կենտրոնախույս պետությունը դարձնել կենտրոնաձիգ պետություն և վերջին հագարացուն դուրս շպրտել հայրենիքից: Իշխանն ասում է, որ պիտի ապացուցի՝ ամրոցների և իշխանական զորության մեջ չի ամփոփվում հայրենիքի ուժը, այլ նրա որդիների անձնազոհության մեջ, որ քսան նահատակներն ավելի արժեն, քան քսան հազար զինվորներից կազմված բանակը: Մարզպետունին որդուն՝ Գոռին, իր զինվորների հետ հավասար է համարում: Իշխանը մտածում էր, որ մեկ է, մահը պետք է գա, ավելի լավ է հայրենիքի համար պայքարում իր որդու մահը տանի, եթե աստված այդպես է որոշել: Մարզպետունին ազգերի գոյության հիմքը տեսնում էր ընտանիքի ամրության մեջ: «Գևորգ Մարզպետունի» վեպը դպրոցական ծրագրերի ամենասիրելի ստեղծագործություններից է, որի գաղափարն է՝ հայրենասիրությունը վեր է ամեն ինչից: Հայ գրականության ամենահայտնի ստեղծագործությունները՝ դպրոցական արդի դասագրքերից, Alpha News-ը ներկայացնում է աուդիոգրքի տարբերակով։