“Чун лекьер я“ (“Мы - орлы“). Флешмоб к Юбилейному вечеру Седагет Керимовой г.

Лекь лагьана Дегь чlавара чаз парада. Лекь лагьана Чаз жуванда, чаз чарада. Чун лекьерив гекъигайд я, Кичlевилер чин тийидай. Чаз лекьер хьиз килигайд я, Кьил хураваз фин тийидай. Чаз къуншиди Лекь лагьана Дагъдин синел муг ийидай. Чаз дустуни лекь лагьана- Цавун юкьвал руг ийидай. Лекь лагьана Сада хъуьрез, Сада кичlез. Сада хвешиз, Сада течиз. Гьич чалагъан лагьанач чаз, Цавар рам авур. Я къузгъундин тlвар ганач чаз, Иви хъваз гьазур. Тlиб лагьанач чаз садани, Вилерни кваз ичlи, мичlи. Чаз садани рангар чlулав, Хуьруьз гъидай хабар чlулав, Пехъ лагьанач. Чаз садани кlек лагьанач, Вичел кьару, Такабурлу. Ингье, ажузд Акур чlавуз Хур виликна къал акъуддай. Кьил виридлай вине кьадай. Зайифбуруз кlуф ягъадай. Лекь лагьана чаз вирида Кьакьанвилер рам ийидай. Дагъларини, цаварини Чун такурла гъам ийидай. Цlуд лекь агъзур къузгъундилай Викlегь жеда лагьана чаз. Лекь акурла чалагъанни Муьтlуьгъ жеда лагьана чаз. Чун вуж ятlа Чир хьанани Я лезгияр? Лекь гафуни Куь хиялриз Нур гъанани Я лезгияр? Чун дуьнядиз Мад лекьер хьиз атун герек. Чи дустариз, чи душманриз Чун лекьер хьиз Акун герек. Чилин винел Чун гьар чlавуз, Кьил виневаз Къекъвен герек. Итимвилихъ Гелкъвен герек. Гьикьван кIеве ХьайитIани, Лап рекьидай бередани Чун лекьер хьиз рекьин герек!