Милиция “Аюунун“ кампаларына тинтүү жүргүзгөн видео

“Аюу“ компаниясынын Сокулук айылындагы жана Токмок шаарындагы кампаларына тинтүү жүргүзүлүп, мыйзамсыз жүгүртүүдөгү 260 тоннадан ашык этил спирти, бухгалтердик документтер, акциздик маркалары жок 360 бөтөлкөдөгү спирт кошулган ичимдиктер табылды. Бул тууралуу ИИМ билдирди. Маалыматка караганда, үстүбүздөгү жылдын жаз айларында ИИМдин Кылмыш иликтөө башкы башкармалыгынын кызматкерлерине Токмок шаарынын аймагындагы өндүрүш ишканаларынын биринде белгисиз адамдар спиртти жана спирт кошулган ичимдиктерди мыйзамсыз түрдө өндүрүүнү уюштургандыгы тууралуу ыкчам маалымат түшкөн. Топтолгон материалдардын негизинде ИИМдин Тергөө кызматы тарабынан Кылмыш-жаза кодексинин 240-беренеси (Спиртти жана спирт кошулган ичимдиктерди мыйзамсыз өндүрүү) боюнча кылмыш иши козголгон. Анын алкагында спиртти жана спирт кошулган ичимдиктерди мыйзамсыз өндүрүүгө мүмкүн болгон даректер аныкталган. “Бир нече даректерде, анын ичинде Сокулук айылында жана Токмок шаарында тинтүү жүргүзүлдү. Натыйжада даяр продукциялар жайгаштырылган кампалардан (“Токмок Буллс“ ЖЧК) мыйзамсыз жүгүртүүдөгү 260 тоннадан ашык этил спирти, “АЮ“ компаниясынын бухгалтердик документтери, акциздик маркалары жок 360 бөтөлкөдөгү спирт кошулган ичимдиктер табылган. Фактылар аныкталгандан кийин бардык кампалар жабылып, кайтарууга алынды“, — деп айтылат маалыматта. Ошондой эле жалпы жонунан 118 дарек боюнча тинтүү жүргөнү белгиленди. Ыкчам-иликтөө иш-чараларынын жыйынтыгында чогултулган далилдердин негизинде жакында Токмок шаарындагы спирт заводунун күзөт бөлүмүнүн башчысы 1982-жылы туулган М.Т., ошол эле ишкананын башкы технологу 1988-жылы туулган И.А. кармалды. Учурда козголгон кылмыш ишинин алкагында комплекстүү тергөө-ыкчам иш-чаралары жүргүзүлүп, бул фактыга тиешеси бар башка адамдар такталууда. Белгилей кетсек, буга чейин президент Садыр Жапаров “Аюу“ компаниясынын спирт жана арак чыгарган заводу мамлекетке өтүп жатканын айткан. Ал “Аюну“ 2,5 жылдан бери эркелеттик, укпады“, деп белгилеген.