Театр илыш, илышна театр! усталык кас 12 декабрь 18:00

Чырык курым пашам ыштат М.Шкетан лӱмеш  театрыште Визымше марий студийын артистше-влак. Тиде —   Малый академический театр пеленсе М.С.Щепкин  лӱмеш кӱшыл театр училищын (ВТУ) выпускникше -влак. Таче нуно театрысе труппын негызше улыт. Ты жаплан чылан поян репертуарым поген шуктеныт, кажныжын могай гынат чап лӱмжӧ уло. Теве  нуно кӧ улыт: Р.Алексеев, А.Асмаев, А.Бусыгин, С.Данилов, А. Егошина, Г.Иванова, Е.Мочалова, А.Сандаков, С.Сандакова (Ягулбаева),  С.Строганова, Э.Яковлев, А.Бирюков, А.Михайлова. 12 декабрьыште  нуно  усталык пашаштлан 25 ий темме лӱмеш кугу концерт программым ончаш темлат.  Тудым йӧратыме спектакльла гыч ужаш, муро, почеламут, мыскара-влак  сӧрастарат.