ДАС ВОIА ДАЬ ХЬЕХАР

ДАС ВОIА ДАЬ ХЬЕХАР Хьайна дала денначун Далла хоастам белахьа, Хьайца дацеи, нанацеи кIаьда-мерза хилалахь, Хье раьза цахилар цанна ма гойталахь, Хьай вежарашца а яхь лелаелахь, Хьай вежарашта эшаш йола хьай хIама кхо ма елахь, Хьай вежарашкара даьнна хIама нахала ма даккхалахь. Мел мо из вале а сагаца хьагI ма лелаелахь, Хьай цIагIа даьнна дов пхьегIа тIа ма кхахьалахь, ГIийла мискачарца сонта ма хилалахь, Хьаьнал къахьийга доацар рузкъа ма гулделахь, Наьха рузкъа лочкъадеш ма хилалахь, Хьай бехк а болаш гаргалол ма хоадаелахь. Лоалахочунца чIоагIа сабаре хилалахь, Айха лелоргдоаца керда загIа тIа ма эцалахь, Хьай фусаме кхаьча саг хьаьша вий тIаэцалахь, Хьаьша кхача дикагIабар лелахь, Хьаьша мотт,гIейба кIаьдагIа бар биллалахь, Хьаьшо даь дехар кхоачашде хьажалахь, Хьаьша дIаваххалца чухьа дов ма даккхалахь, Хьаьша дIаводаш, из накъа ваккхалахь. Лоалахочун таьзета даггара хьовзалахь, Хьай бера тIагIолла нахаца дов ма дахалахь, Хьай моастагIчунца ямарт ма хилалахь, Хьайла боаккхагIчарца гIулакхаца хилалахь, Хьайла кегирчар лерам белахь, ВоаккхагIвар йист хулаш юкъе ма лелхалахь, ВоаккхагIвар чувеча, цунна хьалгIатталахь, ВоаккхагIавар Iо халцца, Iо ма халахь, Хьо Iо хоавой а наIаргахьа халахь, ВоаккхагIчо къамаьл деш,чIоагIа ладувгIалахь, Цун пурамаца мара йист ма хилалахь, ВоаккхагIчунца дIаводаш аьрда оагIора отталахь, Цунна новкъа хула хIама сиха дIаяккхалахь. Хьай дов нахага ма кхувдаделахь, Наьха дов хьайна тIа ма эцалахь, Йоалаю сесаг дикача цIен тIара йоалаелахь, Саг йоалайича аха шера боаккхийчарегI хьулалелахь, Iайха нускалца къамаьл деш даьнеи наьнеи ма хазийталахь, Нускалаца Iохайна даьнеи, наьнеи гаргарча нахае ма гойталахь, Хьайна метала сесагага къамаьл ма дайталахь, Сесага багара гоаламаш дIа ма яхалахь. Хьа нанас йоахе, лоа Iаьржа да, Хьай сесагага из лоа кIай да ма алийталахь, Техе а, Iетте а, вилхе а цIен наьнагIа сесаг е хьажалахь, Сесаг ма йиталахь, цунна тIа сесаг ма йоалаелахь, Ши сесаг а йоалайий даькъаза ма валахь, Хьай лоамий мича ба сесага ма хайталахь, Хьай сесаго из лоамий лохаргболга халахь, Из цунна хоййа, хье фусам да воацилга халахь. ЦIагIа эшаш дар хьо ховш хилалахь, Наьха истий сецо ма гIерталахь, Хьай сесаг нахага ма сецаяйталахь, Хьай сесагаца кад-Iаг къовса ма отталахь, Хьай ноанахой, хьай устцIей лоархIаш хилалахь. Хье Iеш вола фусам айхьза ма яккхалахь, Фусаме барт лоаттош Да хиле латталахь, Къонгаш дукха ба аьле, ЦарегIа доаккхалдеш ма хилалахь, Даьша лелаяь гаргалол хеда ма елахь. Хьайна цхьа дикадаьчоа, кхо дика де хьажалахь, Хьайна цхьа во даьчоа, цхьа во а дийа Iелахь, Хьай воне е таьзета олламий ма хилалахь, Хьай бIаргаха хий доалаш цхьаннена ма гойталахь, Наьха воне е таьзета велаш гIадвахе ма хилалахь. ЭгIаз ваха хье волаш къамаьл ма делахь, Iайха ду къамаьл дувнаца чIоагI ма делахь, Iайха дергдоацар, дергда ма алалахь, КъорIанца дув биъе, доттагIа ма лацалахь, Хьайга ца хаьттача хаттара жоп ма лелахь, Хьайга дIабохьалургбоаца мухь тIа ма эцалахь. Мел гIийла вале а сага курал ма елахь, Мел хьалдолаш вале а, сага хьеста ма лелахь, Хьайга ца кхейкача кхетаче ма ахалахь, Кхейкача хье воде, хьай гIанд лораделахь, Хье гIоттавергволча гIанда тIа ма халахь. Тиша барзкъа дийхе, хьо хьоашалгIа ма гIолахь, ЦIена барзкъа дийхе хьо лаьтта аха ма гIолахь, Наьха къейленаш ха ма гIерталахь, Хьай къайленаш наха ма ювцалахь, Доаца хIама наха тIакхоллаш ма хилалахь, Мел боаккха цабезаш бале а, сага мотт ма тохалахь, Хье мел цIена вале а, къорIаха дув ца баъа гIорталахь, Нахаца модз санна мерза ма хилалахь, Е сим санна къахьа ма хилалахь. Iовдала йола камаьршое, сонта майрале ма лелаелахь, Хьайга тахан дулургдар кхоаненга ма теталахь, Хьайга хьал долча хана мискачанна гIо де хьажалахь, Iайха дIалургдоаца совгIат нахагара ма дехалахь, Хьайна дича ца мегар, наха ма делахь. Дей хина боахамаш дувца ма отталахь, Дай чурташ мичахьа да нахага ма хетталахь, Дай маьхка дар мара ираз доацилга халахь, Дей гIулакх довзалга дIакхача хьажалахь, ГIулакх доацар из саг воацилга халахь, Дай маьхка эшачоа дIаотташ хилалахь, Дезачунга хье кхоачаргвоацилга халахь, Хьайга долчун Iа хам ца боййа.