Марат Дауытов “Фото“

Марат Дауытов Силәбе өлкәһе Сосновка районы Трубный ҡасабаһында йәшәй. Рухлы егет рус һәм башҡорт телдәрендә ижад итә. Фото Һин миңә фотонан йылмаяһың, Мин ултырам бер үҙем бүлмәлә. Һин минең төшөмә лә кермәйһең... Инәйем, ҡалай кәрәкһең миңә! Фотоны ҡулымдан төшөрмәйем Һәм китәм хәтерҙәр иленә... “Тор, улым, өҫтәлгә әҙерләйем“ - Инәйҙең тауышы ишетелә. Мин – малай. Кирелеп сәй эсәйем, Бар донъя ҡайғыhыҙ тойола. Һин һап-һау – ҡоймағыңды ҡояһың, Өйҙә ҡот һәм тәмле еҫ тарала. Һин – инәй: бар хистәрҙе тояһың. Мин – бала: күңелем далала. Төшөндөм. Дүрт мөйөш бүлмәләмен, Йәштәрем фотоға ҡойола. “Егеттәр иламай!“ – ишетәмен. Тауышың өндәгеләй тойола! “Көслө бул, малайым, бирешмә һин Бер ҡасан, бер ниндәй бәләгә!“ Һин һуңғы һүҙҙәреңде әйтәһең, Мин тағын күмеләм хәтергә... Һин кисер, мин бүтән иламайым, Тоғро ҡалам биргән һүҙҙәргә. Ҡәҙерле халҡымдан көс йыйырмын Һәм менермен яңы үрҙәргә.