Sohibqiron qilichi qayerda?

Sharq mamlakatlarida Amir Temur nomi aql bovar qilmaydigan falakning gardishi bilan yo‘g‘rilgan. Uning qabri ziyoratgohga, qilichi esa bahodirlik timsoliga aylangan. Ammo bugun Samarqandda buyuk jahongirning qabrini ziyorat qilish mumkin bo‘lsa-da, qilichi esa qayergadir g‘oyib bo‘lgan. Temuriylar tarixi davlat muzeyining burchagidagi 22-vitrinada bir surat bor. Damashqiy qilichning surati. Uning tagiga qisqagina izoh yozilgan: «Amir Temur qilichi». Suratda damashqiy qilichning sopi va bir qarichcha qismi aks etgan. Uni ko‘rgan kishida daf’atan shunday fikr tug‘iladi: bu qilich fototasvirga olinganiga qaraganda hozir ham mavjud ekan-da! Xo‘sh, Sohibqiron bobomizning qilichi qaerda saqlanmoqda?