Республикала төбәктәрендә ҡаҙ өмәләре гөрләй

Саҡмағош районында үткән милли байрамда Каринэ Хәбирова менән Өфө ҡала хакимиәте башлығының тормош иптәше Венера Мостафина ла ҡатнашты. Ҡалмашбаш ауылында йәшәүсе Зиннәтуллиндар ғаиләһе быйыл 450 ҡаҙ үҫтергән. Уларға тотош ауыл халҡы ярҙамға килде. Байрамса кейенгән өмәселәр, шаян хәбәрҙәр һөйләп, күңелле йырҙар көйләп ҡаҙ йолҡто. Күмәкләгәс, эштең ауырлығы ла һиҙелмәне. Өмәселәр ҡаҙ түшкәләрен сайҡарға һыу буйына юлланды. Уларҙы гармун моңо, күңелле йырҙар оҙатты. Ҡатын-ҡыҙҙар өмә уҙған йорт хужаларына киләсәктә лә именлек, муллыҡ теләне. Байрам сараһы йола буйынса табын артында дауам итте.