Олунньу 26 күнэ - Ньурба улууһа төрүттэммит күнэ!

Кэпсиир СӨ Национальнай архыып 2005-2012 сс. дириэктэрэ, СӨ архыыбынай дьыалаҕа Департаменын 2012-2016 сс. салайааччыта, СӨ култууратын үтүөлээх үлэһитэ, Ньурба улууһун Бочуоттаах гражданина Айталина Афанасьевна Захарова. Икки сүүс сыл анараа өттүгэр Үөһээ Бүлүү улууһа олус киэҥ сиргэ сабардаан сытарынан, салайарга уустугунан, улууһу икки гына хайытарга диэн буоластар (нэһилиэктэр) кинээстэрэ мустаннар, хас да төгүл мунньахтааннар маннык быһаарбыттар: Үөһээ Бүлүү улууһа 5 буоластаах, 2332 дууһалаах, киинэ Ороһуга буоларыгар; Марха улууһа 8 буоластаах, 5093 дууһалаах, киинэ Муоһааныга (Хатыҥ Сыһыыга) буоларыгар. Бу мунньахтарын түмүгүн кинилэр салгыы Саха сирин уобалаһын үрдүкү дьаһалтатыгар туруорсаллар. Онон үөһээҥи салалта 1824 сыл олунньу 14 күнүгэр Үөһээ Бүлүү улууһун Марха уонна Үөһээ Бүлүү улуустарыгар хайытарга диэн уураах таһаарар. Өссө бу иннинээҕи уурааҕынан 1824 сыл олунньу 2 күнүгэр саҥа тэриллибит Марха улууһун кулубатынан Бүөтүр Слепцову (Таркаайы), быыбаранайдарынан Байбал Самсоновы (Үөдэй) уонна Сааба Мөрсүөйэби (Сүлэ) бигэргэтэллэр. Онон Ньурба улууһа төрүттэммит күнүнэн олунньу 14 күнэ, онтон саҥа халандаарынан олунньу 26 күнэ буолар.