ОТОГОЙ НААДАН. САЯНЭ ГОМБОЖАПОВА.

Агада боложо байhан hур харбалгаар Ород Уласай чемпионадай хоёрдохи үдэртэ Ага голой эрьедэ «Отогой наадан» гэжэ нэрэтэй урилдаан-наадан болобо. Жаахан үхибүүдhээ эхилээд ахамад ахатанууд ба абгайнарай бүридэлтэйгээр бүлын команданууд хабаадаха ёhотой гэжэ дүримтэй юм. Хабаадагшад түрэл арадайнгаа ёhо заншал, уг уламжалал (традиции), түүхэ домог, оньhон үгэ, өөрынгөө бүлын уг удам, уг гарбал мэдэхэ ёhотой гэhэн дүримтэй. Буряад үндэhэн наадануудые “Шагай наадан“, “Баргай наадан“ наадажа шадаха, мүрысэхэ ёhотой байгаа. Урилдаан-нааданда Ага нютагта ажаhуудаг ямаршье арадай түлөөлэгшэд хабаадажа болоно.