GURBANGULY BERDIMUHAMEDOW ARKADAG ŞÄHERINDE GEÇIRILEN WELOSIPEDLI ÝÖRIŞE GATNAŞDY

7-nji aprelde ýurdumyzyň ähli künjeginde Bütindünýä saglyk güni mynasybetli köpçülikleýin welosipedli ýörişler geçirildi. Säher bilen Arkadag şäherinde ýaýbaňlandyrylan welosipedli ýörişe türkmen halkynyň Milli Lideri Gurbanguly Berdimuhamedowyň göreldesine eýerip, bagtyýar ildeşlerimiz agzybirlikde gatnaşdylar. Şäher gözelligi bilen sepleşýän welosipedçileriň owadan hatary çärä gatnaşyjylara keýpiçaglyk paýlady. Turuwbaşdan ruhubelentlige, toý joşgunyna beslenen köpçülikleýin ýörişe şäher, etrap häkimlikleriniň, jemgyýetçilik guramalarynyň, edara-kärhanalaryň ýolbaşçylarydyr hünärmenleri, şeýle-de ýaşlar we ussat türgenler gatnaşdylar. Arkadag şäherinde geçirilen dürli sport çäreleri halkymyzyň Bütindünýä saglyk gününe berýän ähmiýetini aýdyňlygy bilen äşgär edip, ata Watanymyzyň sagdynlygyň we ruhubelentligiň mekanyna öwrülýändigini dabaralandyrdy.