ԱՄՆ–ն Ադրբեջանին է դաշնակից համարում, ոչ թե Հայաստանին. Խաչիկյան

Քաղաքագիտության դոկտոր Արթուր Խաչիկյանը «Աբովյան Time»–ի եթերում անդրադարձել է վաշինգտոնյան բանակցություններին, հայ–ադրբեջանական հարաբերություններում Արևմուտքի և ՌԴ–ի առաջարկներին, ՀՀ իշխանությունների զիջողական քաղաքականությանն ու աշխարհաքաղաքական երկու կենտրոնների հետ խաղին։ Խաչիկյանը կարծում է, որ Հայաստանի թույլ դիրքն է պատճառը, որ ո՛չ դաշնակից Ռուսաստանը, ո՛չ Իրանը Հայաստանի հետ գործ ունենալ չեն ցանկանում։ «Միևնույն ժամանակ ՀՀ–ն փչացրել է իր հարաբերությունները բոլոր գործընկերների հետ։ Մենք ուղղակի հանճար ենք, որ կարողացանք բոլոր հարևան պետությունների հետ փչացնել հարաբերությունները միաժամանակ»,– նշում է նա։ Խաչիկյանի խոսքով` որևէ երկիր չի ցանկանում գործ ունենալ մի պետության հետ, որն ինքն իրեն չի կարողանում և չի ցանկանում պաշտպանել։